Seyyid Məcid Əsri

Olmaz

Eşqin yolu macərasız olmaz

Üşşaq başı bəlasız olmaz

Ey asi könül, itaətim tut

Salik yolu rəhnümasız olmaz

Biganə qalıb çəkilmə saqi

Çəkmək qədəh aşinasız olmaz

Eşq əhli olur fəqir u üryan

Zöhd əhli əba qəbasız olmaz

Naseh zəlisənmi ya nəsən sən

Adəm bu qədər həyasız olmaz

Sandım ki gədanəm ey şəh et əfv

Şəh lütf ü gəda xətasız olmaz

Olsam gər itin dedim olurmi

İt-get dedi ol vəfasız olmaz

Olmaz bu qədər əda də ey yar

Hərçənd ki yar ədasız olmaz

Əsri o həkim verdigi dərd

Min şükr ola ki dəvasız olmaz

Sənin

Hər qədəm atdıqda səsləndikcə xəlxalin sənin

Qəbrdə titrər təni-üşşaqi-pamalin sənin

Zülfin içrə çilləkeş könlüm cünun olsa nə ğəm

Çün çehel dağ urmağa amadədir xalin sənin

Ğönçədən mətləb ləbindir sərvdən məqsəd qədin

Səfheyi-gülzardə hər nəqş timsalin sənin

Qəddi xəm həmmal söylüb yükləmə dərdin mana

Ey könül həmmal özünsən yoxdu həmmalin sənin

Uymusan qal əhlinə ey can özündən hali ol

Özgələr həmhali olma özgədir halin sənin

Küllən ol kül mən tək ey pərvanə pərvaz eyləmə

Şəm` odun söndürməsin badi-pər ü balin sənin

Mənzilin zülmətdi çün salmır o məh bir yol güzər

İntizar ilə keçir Əsri məh ü salin sənin

Oldu

Cövrün də çox umduqda könül yarim az oldi

Bədbəxt həp eşqündə sənin yarimaz oldi

Tam atmaq içün saqi başimdan bu xumari

Doldur əyaği başə çəkim yarim az oldi

Yüz gəz dedi könlə müjəmə qaşima az bax

Vadar seni etmə dəlim yarim az oldi

Tən böl tənim at ac itinə yarimi yox yox

Cansız cəsədim hamisin at yarim az oldu

Çox istəyən azdan olur Əsri dilədim mehr

Çox gördi mənə cövrini də yarim az oldu

Eylər

Urar xal könlümə xali qaşı qəddim kəman eylər

Kəman tək xal urar bu binəva canim fəğan eylər

Kitab açdım kitabim bağlumiş halim bəyan oldi

Nihan bəxt ulduzum ol mah içün falim əyan eylər

Bayıldar buy–i muyi könlüm ayıldar dəm–i fəmmi

Yüzi mehri xoş əhvalim gözi qəhri yəman eylər

Sözüm şirin qılar ol bal dodağin zikri misra`im

Əgər ol sərv qəddin vəsfi movzun u rəvan eylər

Çapardim Bisütun dağin yapardim qəsr–i Şirin mən

Gər ey Fərhad bilsəm xosrovum anda məkan eylər

Güman ki zənn edür naseh həqiqətdən olub agəh

Bu zənnin bir həqiqət olduğın ğafil güman eylər

Alırsan ibtidadən çün vəfa dərsin bu məktəbdə

Səni ustad-i eşq ey tifl Əsri imtəhan eylər

Cəm oldu yaş

Ğəm dəmi ətrafıma cəm` oldu yaş

Ah mana həmdəm olub çəkdi baş

Rif`ətim ey ah nola yet gögə

Dövlətim ey yaş dəxi başdan aş

Ah könül bəzmim üçün dudi-ud

Qanlu yaş altun yüzümə daş ü qaş

Halimi hər dəm edər izah ah

Razimi hər ləhzə qılar faş yaş

Ah çıxub yaş axınca didim

Bu ğəm olar şərh ona bu sirr faş

Yaşıma baxmaz məgər ol çeşmi məst

Ahimə yanmaz dimə ol bağrı daş

Sirrim əyandır elə halim bəyan

Ah çəküb dökməz idim yaş kaş

Əsri saçub yaş dəxi etmə ah

Dər nəzər–e xəlq xəceltər məbaş

Güllər

Aç yüzin də`viyi-hüsn et qızara ta güllər

Tök telin bir də həsəddən dağıla sünbüllər

Nalədə itləri ilə tək ötüşməkdə könül

Səsinə münsif olub səs verin ey bülbüllər

Can quşum bir nəfəs ah atəşinə tən qəfəsin

Yandıra bilmədi başinə ələnsin küllər

Nə ağır uyquya getmiş oyadın mey satanı

Gəlmişik süftə edək biz ayağı yüngüllər

Qıvrılursan gecələr Əsri ilan vurmuştək

Yoxsa qatmış yuxuna zəhr o qəra kaküllər

Qələm

Qələm istər ki xətin hərfilə etsin tə`rif

Yoxmi vəhmi bu hərifin edə nagəh təhrif

El ki xain qalanı Kə`be–i könlüm fəthin

Sən əminsən edərəm tək sənə ey büt təklif

Yaslanam kölgənə derdim günəş üzlü sərvim

Zərrəcə kölgəsi yoxmış qədinin öylə lətif

Baş qoyub səcdə edəm derdim ayağun izinə

Qoymaz imiş yoluna iz qədəmün onca xəfif

Yüz sənəm gər məni min dinə çəküb leyk mənə

Eşqinin gözləməgim şər`in olub din–i hənif

Əgər əğyarin əlindən edər olsan hicrət

Gəzmə bir ğeyr mədinə könülə ver təşrif

Hüsn me`racinə getdün güni ayi ötdün

Bəşər etməz mələkim hüsnüni kamil tövsif

Qalib–i şe`rimə can zikridi Əsri yoxsa

Nəmə lazimdi ki boş qafiyə vü vəzn ü rədif