Yetim Qacar

Mənə belə baxma mən elə baxsam 
Mənim baxışımda yanıb bişərsən 
Gözümlə qəlbimə səni salmışam 
Sözümə baxmasan gözdən düşərsən

​

Günay Fuad qızı

Mənə elə baxma yandırar odum,
Alışıb yanarsan, külə dönərsən.
Axarsan hər gecə didəmdən mənim
Enib yanağımda selə dönərsən.

​

Yetim Qacar

Mənə elə baxma, sinə dağımı 
Gözümün yaşıyla gül eliyərəm 
Cəmi bircə dəfə çəksəm ahımı
Bütün kainatı kül eliyərəm

​

Günay Fuad qızı

Soyuyub ürəyim, çəkmişəm ahı,
Ver alım boynuma ver, bu günahı,
Tanrıya bağladım bütünn pənahı,
Keçməyib gecədən helə dönərsən...

​

Yetim Qacar

Mənə elə baxma, içim odlanır 
Tüstüsü gözümdən su kimi axır 
Mənimtək sevənlər dəli adlanır 
Ev qurmaq istəyib evini yıxır

​

Günay Fuad qızı

Sənin gözlərində nəyəm, əzizim
Mənim gözlərimdə eşqsən kədərsən.
Bilirəm könlümə dolandan bəri.
Sən də hamı kimi gəldi-gedərsən...

​

Yetim Qacar

Mənə elə baxma, gözüm qaralır 
Gözümdən gözünə bir yol uzanır 
O yola baxmaqdan koksüm saralır 
Gözlər şama dönüb bu yolda yanır

​

Günay Fuad qızı

Baxma arzularım var o gözlərdə,
Baxma ümidləri vermə amandı.
Gəl məni saxlama, burax əlimi, 
Qovuşa bilmərik, bu boş gümandı...

​

Yetim Qacar

Mənə elə baxma, mənim əzizim
Susmağım sayılmaz günahı dilin
Mən eşq qəvvasıyam, sənsən dənizim
Tək arzum, olmasın hec vaxt sahilin...

​

Günay Fuad qızı

O mavi dənizi sevmə, sevgilim,
Atma dalğalara daha özünü.
Unudum sevgilim, unudum deyə
Baxma gözlərimə gəl çək gözünü...

​

Yetim Qacar

Mənə elə baxma, sənin baxışın 
Canımı odlayan çətin sualdı
Bizi ayırmaz ki, həsrət yağışı 
Sənin həsrətin də, mənə vüsaldı...

​

Günay Fuad qızı

Vüsalın həsrəti şirin olarmış,
Gəl tut əllərimi, yetək vüsala.
Çəkdiyim sevginin yası, əzizim
Bir bax varlığımı saldı nə hala?!

​

Yetim Qacar

Mənə elə baxma, sən elə etmə
Kor olsun gözlərim, tutulsun dilim
Məni ayrılığa verərək getmə 
Apar özün ilə məni, sevgilim...

​

Günay Fuad qızı

Mənə elə baxma deyə bilmərəm,
Yenə o sevgini eşqi yaşayaq.
Gəl tut əllərimdən, bir ömürr boyu.
Ölümsüz sevgini qəlbdə daşıyaq...

​

Yetim Qacar

Mənə elə baxma, tutum əlindən 
Yetərki danışdın sükutunla sən 
Eşitmək istərəm sənin dilindən:
Səni ölənəcən sevəcəyəm mən